Gweithio'n hyblyg

Lleoliad gwaith

All fy nghartref fod yn lleoliad gwaith rŵan?

Ni fydd lleoliadau gwaith yn newid; bydd eich lleoliad gwaith yn parhau yn unol â’ch contract cyflogaeth.

Darperir lleoliad gwaith i chi yn unol â’ch contract cyflogaeth a bydd yr holl gyfleusterau ar gael yn eich lleoliad gwaith. Mae gweithio o gartref yn ddewis y gallwch ei wneud. Bydd pa mor aml y byddwch yn gweithio o gartref ac yn y swyddfa wedi’i seilio ar anghenion y busnes i ddechrau ac yna ar ddewis personol y gweithiwr.

Bydd angen ymgynghori â staff ac undebau llafur yn y ffordd arferol o ran unrhyw newid i leoliadau gwaith yn y dyfodol.

Fy lleoliad gwaith yn fy nghontract yw Neuadd y Sir, Rhuthun, ond rwyf yn byw ym Mhrestatyn. Fyddai hi’n bosibl i mi fynd i Dŷ Russel, y Rhyl i weithio gan ei fod yn nes at fy nghartref?

Gyda chymeradwyaeth eich rheolwr, gallwch weithio o unrhyw swyddfa briodol sy’n eiddo i’r cyngor. Fodd bynnag, bydd eich lleoliad gwaith yn parhau fel y nodir yn ein contract. Pan fyddwch yn gweithio mewn lleoliad gwahanol, bydd arnoch angen ystyried pa offer sydd ar gael i chi ei ddefnyddio ac efallai y bydd angen i chi archebu ystafell gyfarfod briodol i weithio ynddi pan fo’n berthnasol.

Beth os byddaf eisiau gweithio o’m cartref gwyliau yn y DU neu o dramor?

Dim ond gyda chymeradwyaeth y rheolwr atebol y caniateir ymgymryd â gwaith o ail gartref / cartref gwyliau yn y DU. Bydd angen i weithwyr sy’n dymuno gweithio y tu allan i’r DU geisio awdurdodiad gan eu Pennaeth Gwasanaeth a Phennaeth TGCh a bydd hyn ond yn cael ei ganiatáu mewn amgylchiadau eithriadol.

Allaf i weithio o leoliad arall heblaw fy nghartref?

Os yw gweithiwr yn gweithio o gartref, y disgwyliad yw mai hwn yw’r cyfeiriad cartref sydd wedi cael ei ddarparu i’r cyngor. Os yw gweithwyr yn dymuno gweithio o gyfeiriad neu leoliad arall, dylai’r gweithiwr geisio awdurdodiad drwy ei reolwr atebol.

Fyddwn ni’n edrych ar leihau nifer y swyddfeydd / adeiladau?

Mae adolygiad o’n gofod swyddfa yn cael ei gynnal i asesu ein hanghenion cyfredol ac i’r dyfodol.

Teithio

Allaf i hawlio costau teithio o’m cartref?

Na - Mae unrhyw hawliadau/costau teithio yn dod dan y polisi teithio a chynhaliaeth - ni fydd unrhyw beth yn newid o ran teithio; byddwch yn parhau i hawlio yn yr un ffordd ag o’r blaen. Cyfeiriwch at y Polisi Teithio a Chynhaliaeth am fwy o wybodaeth.

Cyfarfodydd

A all fy rheolwr ofyn i mi ddod i’r swyddfa neu i gyfarfod wyneb yn wyneb pryd bynnag y dymunent?

Efallai y bydd angen i weithwyr fod yn y gwaith ar ddiwrnod penodol, ar gais eu rheolwr atebol neu Bennaeth Gwasanaeth, ar gyfer cyfarfodydd, hyfforddiant, apwyntiadau gyda chwsmeriaid y mae’r rheolwr atebol a / neu’r Pennaeth Gwasanaeth wedi penderfynu y dylid eu cynnal wyneb yn wyneb. Yn yr un modd, efallai y bydd amgylchiadau lle gofynnir i weithwyr weithio o bell neu o leoliadau gwaith eraill, pan fyddai gweithwyr fel arall wedi disgwyl bod yn y gweithle. Mewn achosion o’r fath, bydd gweithwyr yn cael cymaint o rybudd â phosib, fodd bynnag, bydd disgwyl iddynt fod yn bresennol.

A oes raid i mi deithio i gyfarfod wyneb yn wyneb, neu alla i fynychu ar-lein a’i wneud yn hybrid?

Gallwch ofyn am gael mynychu cyfarfod wyneb yn wyneb ar-lein; fodd bynnag efallai bydd gofyn i chi fynd i’r gwaith ar gyfer rhai cyfarfodydd fel y pennir gan eich rheolwr.

A ellir cynnal cyfarfodydd un-i-un ar-lein?

Gellir, gellir cynnal cyfarfodydd un-i-un un ai ar-lein neu wyneb yn wyneb, gall rheolwr drafod yr hyn a ffefrir â phob gweithiwr. I gael arweiniad pellach, gweler y ddogfen ‘Canllaw ar sut i ymgysylltu â thîm sy’n gweithio’n ystwyth’.

Gweithio o gartref

Alla i hawlio costau band eang a thrydan?

Bydd gweithwyr yn gyfrifol am ddarparu eu band eang eu hunain at ddibenion gweithio ystwyth. Ni fydd y cyngor yn ad-dalu unrhyw gostau ychwanegol sef trydan, band eang, llinellau ffôn ac ati.

Alla i brynu desg, cadair, argraffydd ac ati a hawlio amdanynt?

Mae gofyn i weithwyr sy’n gweithio o gartref ddarparu amodau gwaith addas yn cynnwys cadair a desg. Ni fydd gweithwyr yn gallu hawlio costau unrhyw offer heblaw am yr offer TGCh isod. Mae’n bosibl y bydd ar weithwyr sydd angen addasiadau rhesymol angen offer ychwanegol a bydd hyn yn cael ei drefnu mewn ymgynghoriad ag iechyd galwedigaethol a’r rheolwr atebol.

Bydd gweithwyr yn cael y dechnoleg a’r offer TGCh angenrheidiol er mwyn gweithio mewn modd ystwyth. Byddwch yn cael:

• Gliniadur
• bysellfwrdd a llygoden
• stand gliniadur
• clustffonau

Beth os nad oes gennyf le i weithio yn fy nghartref?

Gallwch weithio o’ch man gwaith arferol neu drwy drefniant, un o swyddfeydd eraill priodol y cyngor

Beth os nad wyf eisiau gweithio o gartref?

Gallwch weithio o’ch man gwaith arferol neu drwy drefniant, un o swyddfeydd eraill priodol y cyngor.

Beth os nad yw fy nghartref yn lle diogel i fod ynddo ac i weithio ynddo?

Os nad yw gweithiwr yn gallu gweithio gartref yn ddiogel, yna bydd angen gweithio o swyddfa briodol sy’n eiddo i’r cyngor.

Beth os oes gen i anabledd ac angen offer arbenigol i weithio?

Mae’n ofynnol i weithwyr sy’n gweithio gartref ddarparu amodau gwaith addas yn cynnwys cadair a desg, fodd bynnag, yn unol â Deddf Cydraddoldeb 2010, bydd y Cyngor yn ystyried ac yn cefnogi unrhyw addasiadau rhesymol. Bydd pob cais am offer arbennig yn cael ei ystyried gan Iechyd Galwedigaethol.

Ydw i angen sicrhau bod fy yswiriant cartref yn caniatáu i mi weithio o gartref?

Mae cyfrifiaduron, gliniaduron, ffonau ac unrhyw offer arall a ddarperir gan y Cyngor wedi’u cynnwys ym mholisi yswiriant y Cyngor. Fodd bynnag, bydd angen i weithwyr barhau i wneud yn siŵr bod yr offer ac unrhyw wybodaeth sydd ar yr offer yn ddiogel.

Mae gweithwyr yn gyfrifol am gysylltu ag unrhyw un â diddordeb yn eu heiddo (e.e. benthycwyr morgeisi, landlordiaid, lesddeiliaid, yswirwyr adeiladau a chynnwys) i sicrhau nad oes unrhyw beth y mae arnynt angen ei ystyried wrth weithio gartref. Ni fydd y Cyngor yn gyfrifol am unrhyw gostau ychwanegol o ganlyniad.

Bydd gweithwyr sy’n gweithio gartref yn cael eu cynnwys yn y Polisi Atebolrwydd y Cyflogwr. Rhaid rhoi gwybod am unrhyw ddamweiniau ar unwaith yn unol â chanllawiau adrodd y Cyngor.

Beth os byddaf yn cael damwain yn y cartref, beth ddylwn i ei wneud?

Mae damweiniau yn y cartref yn ystod oriau gwaith yn cael eu hystyried yn ddamweiniau cysylltiedig â’r gwaith a rhaid rhoi gwybod i’r rheolwr atebol ar unwaith a rhaid i’r gweithiwr hefyd gwblhau ffurflen ddamweiniau CSDd ar-lein. Dim ond pan fydd damweiniau yn gysylltiedig â’r gwaith sy’n cael ei wneud a’r offer y mae CSDd wedi’i ddarparu i gyflawni’r gwaith hwnnw y bydd yn rhaid i weithwyr roi gwybod amdanynt.

Beth os byddaf yn sâl ac yn methu mynd i’r swyddfa ond yn gallu gweithio ychydig oriau gartref?

Wrth weithio o bell, os nad yw gweithiwr yn gallu gweithio oherwydd salwch, bydd gweithdrefnau cofnodi absenoldeb salwch yn berthnasol fel ag y byddent pe bai’r gweithiwr yn y gweithle. Cyfeiriwch at Weithdrefn Presenoldeb yn y Gwaith y Cyngor am fwy o fanylion.

Mae fy mhlentyn yn sâl ac yn methu mynd i’r ysgol / lleoliad gofal arferol. Alla i weithio o gartref wrth ofalu am fy mhlentyn?

Rhaid i weithwyr nodi nad yw'r gallu i weithio gartref yn cymryd lle gofal plant neu gyfrifoldebau tebyg fel gofalwr. Cyfrifoldeb y gweithiwr fydd sicrhau bod ganddynt drefniadau gofal plant / cyfleusterau gofal digonol. Fodd bynnag, os ydych yn teimlo eich bod yn gallu gofalu am eich plentyn a parhau i weithio pan fyddant i ffwrdd yn sâl, yn dilyn trafodaeth gyda'ch rheolwr, gallwch wneud hynny. Os na fyddwch yn gallu gweithio yn yr amgylchiadau hynny, mae ffurflenni absenoldeb eraill (yn cynnwys fflecsi) y gallwch eu defnyddio yn dibynnu ar gymeradwyaeth eich rheolwr.

Iechyd a diogelwch

Fel rheolwr, pa gyfrifoldebau Iechyd a Diogelwch sydd gen i o ran gweithio ystwyth?

Rhaid i chi ddatblygu a chofnodi Asesiad Risg Gweithio Ystwyth gyda gweithwyr a sicrhau eu bod yn deall canlyniadau’r asesiad risg ac yn eu dilyn.

Fel gweithiwr, pa gyfrifoldebau Iechyd a Diogelwch sydd gen i wrth weithio mewn modd ystwyth?

1. Cwblhewch Restr Wirio Gweithio Gartref a rhannu unrhyw faterion arwyddocaol gyda’ch rheolwr atebol.
2. Cynnal Asesiad Risg Gweithfan a rhoi gwybod i’ch rheolwr atebol am unrhyw ganfyddiadau arwyddocaol e.e. gofyniad am adnoddau ychwanegol neu anaddasrwydd eu gweithfan gartref.
3. Dilyn canfyddiadau unrhyw asesiadau risg tîm a rhoi gwybod i’ch rheolwr atebol am unrhyw bryderon neu ddiffyg dealltwriaeth.

Gwaith tîm

Sut galla i gynnwys unigolyn newydd yn y tîm?

Cyfeiriwch at y Ddogfen Arweiniad ‘Sut i gyflwyno gweithiwr i weithio’n ystwyth’, sy’n cynnwys cyngor ar ganllawiau i gynnwys gweithwyr newydd i’r tîm.

Sut gall gwaith tîm fod yn berthnasol pan fydd pawb gartref?

Cyfeiriwch at y Ddogfen Arweiniad i Reolwyr ‘Sut i ymgysylltu â thîm sy’n gweithio’n ystwyth’.

Delwedd gorfforaethol

Mae fy ngweithiwr eisiau gwisgo trainers yn y swyddfa, ydy hyn yn briodol?

Mae’r Polisi Gweithio Ystwyth bellach yn cynnwys adran ar wisgo ar gyfer eich diwrnod, sy’n caniatáu i weithwyr wisgo yn dibynnu ar eu diwrnod, sef pan na fydd ganddynt gyfarfodydd na chyswllt â’r cyhoedd er enghraifft, yna gallant ddewis gwisgo’r hyn sy’n gyfforddus iddyn nhw. Rhaid i weithwyr sicrhau bod unrhyw esgidiau neu ddillad yn addas ac yn ddiogel ar gyfer y gwaith sy’n cael ei wneud ac mae angen bod yn ddoeth.